Жыйында айтышкан депутат Ак үйдөгү кабинетинен куулду
Жогорку Кеңештин депутаты Өмүрбек Бакиров Ак үйдөгү кабинетинен куулду. Эл өкүлүнүн жардамчысынын айтымында, бул учурда Бакиров Жогорку Кеңештин имаратында болгон эмес.
"Бакиров 7-кабаттагы иш бөлмөнүн биринде отурчу. Ал мурдагы чакырылышта да ушул кабинетте отурчу, себеби фракция лидери болгон. 18-ноябрда администрация кызматкерлери келишип Бакировдун уруксаты жок эле буюмдарын чыгарышты. Кабинетти ачып киришти", - деди.
Өмүрбек Бакиров азырынча президенттин иш башкармалыгы ага кандай иш бөлмө берери белгисиз экенин айтат.
Бакировду кабинеттен чыгаруу чечимин президенттин аппараты кабыл алган.
Белгилей кетсек, 17-ноябрда парламентте кыргыз-өзбек чек арасын делимитациялоо жана демаркациялоо боюнча келишимди, анын ичинде Кемпир-Абад суу сактагычын биргелешип башкаруу келишимди карап, жактырды. Маселе каралып жатканда Ташиев менен Бакиров кайым айтыша кетишкен.
