Бул жолу Исманкуловдун клиникасын жаба албай, дарбазасын ширетип кетишти (сварка). Видео
Бүгүн, 25-мартта Бишкек шаардык мэриясынын жана Кыргызстандын Саламаттыкты сактоо министрлигинин кызматкерлери Исманкуловдун клиникасын дагы бир жолу жабууга аракет кылышты. Бирок жыйынтыкка жетишпей, клиниканын кире бериш дарбазасын ширетип, негизги эшиктен башка бир нече эшикке мөөр басып кетишти.
Клиникага Бишкек шаардык мэриясынын ар кайсы бөлүмдөрүнөн, ошондой эле Саламаттыкты сактоо министрлигинин 10-15тей кызматкерлери келишкен. Исманкулов милиция кызматкерлерине телефон чалып, чиновниктердин мыйзамсыз аракеттери тууралуу арыз жазган.
Бишкек шаардык мэриясынын Муниципалдык менчикти башкаруу департаментинин директорунун орун басары Талант Рыскулбек уулу ижарачы Исманкуловго анын клиникасы муниципалдык имаратты бир тараптуу бузулган келишим боюнча ээлеп турганын билдирди.
"Саламаттыкты сактоо министрлигине бейтаптар үчүн керебеттерди орнотууга имарат керек, ал эми Исманкулов аны бошотууга милдеттүү. Ичинде бейтаптар бар деп эле бүт клиниканы пломбалаган жокпуз. Бошотууга үч күн убакыт беребиз. Анын милицияга кайрылууга укугу бар, бирок биз эмнеси болсо да имаратты бошотобуз", - деди Рыскулбек уулу Исманкуловдун алдында.
Бирок Алмазбек Исманкулов мэриянын келишимди бузуу боюнча бир тараптуу чечимине макул эместигин билдирип, бул чечим боюнча сотко кайрылганын белгиледи. Буга байланыштуу алар имараттан чыгарууга милдеттүү эмес.
"Эгер сот аны мыйзамдуу деп тапса, клиника имаратты бошотуп берет. Ага чейин ал иштей берет. Айланабызда көптөн бери ызы-чуу болуп келет, бул башаламандыктан, мыйзамсыздыктан тажадык", - деди Исманкулов.
Клиниканын директору коркутуп-үркүтүүлөр болгонун, белгисиз адамдар пулемёт менен клиниканы аралап, алтургай клиниканын кире беришин кум менен жабууга аракет кылганын билдирди.
"Клиниканын кире беришиндеги кум түшүрүлгөнү боюнча милицияга арыз жазылган, бүгүнкү күндөгү өзүм билемдик боюнча да арыз жазам. Анткени алар дарбазаны мыйзамсыз ширетип, өрт коопсуздугунун эшигин да жаап салды. Бул жерде бейтаптар бар", - деп түшүндүрдү Исманкулов.
