Кытай Кыргызстанга кайтарымсыз 200 млн юань берет
Суу ресурстары, айыл чарба жана кайра иштетүү өнөр жайы министри Бакыт Төрөбаев Кытайдын Эл аралык кызматташтык жана өнүктүрүү мамлекеттик агенттигинин директору Луо Чжаохуэй менен Пекинде жолугушту. Анда кыргыз-кытай кызматташтыгынын актуалдуу маселелери талкууланганын Министрлер кабинетинен маалымдашты.
Тараптар Кытай өкмөтүнүн гранттык жардамынын алкагында артыкчылыктуу долбоорлордун тизмесине кирген Кыргызстан менен Кытайдын ортосундагы долбоорлордун аткарылышынын учурдагы абалы жана эки тараптуу кызматташуунун перспективалары жөнүндө талкуу жүргүздү.
Жолугушуунун жыйынтыгында Кыргыз Республикасынын Министрлер кабинети менен Кытай өкмөтүнүн ортосунда кайтарымсыз жардам берүү жөнүндө макулдашууга кол коюлду.
Макулдашууга ылайык, долбоорлор боюнча эки тараптын ортосунда келечектеги келишимдерди ишке ашыруу үчүн жалпы суммасы 200 миллион кытай юанын кайтарымсыз жардам катары берет.
Гранттык негизде бериле турган каражат эки тараптуу техникалык-экономикалык жардамдын долбоорлорун ишке ашыруудагы кызматташуунун алкактары жөнүндө макулдашууга ылайык, ошондой эле эки өлкөнүн ортосундагы достук мамилелерди жана техникалык-экономикалык кызматташтыкты андан ары өнүктүрүү максатын көздөйт деп айтылат маалыматта.
