Чочконун бөйрөгү салынган биринчи адам операциядан эки ай өткөндөн кийин каза болду

Чочконун бөйрөгү салынган биринчи адам операциядан соң эки айдан кийин каза болду. Оорукана көңүл айтып, 62 жаштагы Ричард Сулейман трансплантациядан улам каза болду деп эсептөөгө эч кандай себеп жок экенин айтты.

Ага 2024-жылдын март айында Массачусетс ооруканасында чочконун бөйрөгүн салууга операция жасалган. Ошондо хирургдар трансплантацияланган бөйрөк кеминде эки жыл иштейт деп айтышкан. Ага чейин ал 2018-жылдан бери донордук бөйрөк менен жашаган, бирок беш жылдан кийин ал бөйрөк иштебей калган.

Маркумдун үй-бүлөсү дарыгерлерге жасаган аракеттери үчүн ыраазычылык билдирип, аларга эч кандай дооматы жок экенин билдиришкен. Сулейманга организм жаныбардын бөйрөгүн кабыл албай калышы мүмкүн деп эскертилген, бирок ал тобокелге барууну чечкен.

Буга чейин чочконун жүрөгү салынган эки бейтап операциядан бир нече жумадан кийинки кыйынчылыктардан улам каза болуп калышкан.