Москвага учуп барган кыргызстандыктарга Шереметьеводон эки күндөн бери чыгууга салышууда
Кыргызстандын Москвадагы элчилиги Шереметьево эл аралык аэропортунда жүргөн кыргызстандыктар боюнча тиешелүү иштерди жүргүзүүдө. Бул тууралуу дипломатиялык өкүлчүлүктүн басма сөз кызматы билдирди. Буга чейин социалдык тармактарда жана кыргыз сегментинин ЖМКларында Кыргызстандан келген эмгек мигранттарына Шереметьево аэропортунун аймагынан экинчи күн чыгууга тыюу салынганы тууралуу маалымат пайда болгон.
"Биз кечээ Бишкектен учуп келип, Москва убактысы боюнча 18:40та Шереметьевого кондук. Бул жерден паспортторубузду чогултуп, бир бөлмөгө киргизишти. Телефондорубузду төрт саат текшеришти, кайтарып беришпеди. Бармак издерибизди алышты. Кээ бир кагаздарга кол коюуга аргасыз болдук. Украиндарды, тажиктерди сабашты. Биз ачка отурабыз бир нече кун, суу да беришпеди. Кылмышкерлер бир комнатага камалгандай, бир комнатада ондон ашык кыргызстандыктар отурат. Башкаларында дагы бар. Адегенде булар "кошумча текшерүүлөр" деп айтышып, андан кийин такыр түшүндүрбөй коюшту. Элчиликке кайрылдык, алар бизге жардам бере албастыгын айтышты", - дейт Шереметьеводон чыга албай жатканын кыргызстандыктардын бири "Азаттык" радиосуна билдирди.
Белгиленгендей, кайра учуп кеткен жарандар бар, бирок акыркы эки күндө билет баасы 60 миң сомго чейин көтөрүлдү. Аэропортто Кыргызстандын канча жараны бар экени тууралуу так маалымат жок. 22-март күнү кечинде Москванын жанындагы Красногорск шаарындагы Crocus City Hall концерттик залында белгисиз адамдар ок чыгарган. Имаратта жарылуу болуп, өрт чыккан. Кээ бир маалымат боюнча, кеминде үч киши болгон куралчан адамдар өңүтсүз ок атышкан. 130дан ашык адам өлгөнү кабарланууда.
Имараттын үчтөн бир бөлүгү күйүп, коюу кара түтүн чыккан. Өрт өчүрүүчүлөр чатырдан адамдарды чыгарып, 100дөй адамды эвакуациялашты. Россия Федерациясынын Тергөө комитети теракт боюнча кылмыш ишин козгоду. ФСБнын жетекчиси Александр Бортников президент Владимир Путинге 11 адамдын кармалганы тууралуу маалымат берди. Кармалгандардын арасында Крокус Сити Холлдогу терактка "түздөн-түз тиешеси бар" төрт террорист бар.
