Россияда Евгений Пригожинге таандык бизнес учагы кулап түштү. Ал ичинде болгону айтылууда
Россиянын Тверь облусунун Бологовский районундагы Куженкино айылына жакын жерде учак кулап түштү. "База" Эмбраердин бизнес учагы кыйраганын маалымдады.
Россия Федерациясынын Өзгөчө кырдаалдар министрлиги Тверь облусунда жеке учактын кыйрашынан он адам каза болгонун, алардын үчөө экипаж мүчөлөрү экенин билдирди. Кулаган бизнес учак Москвадан Санкт-Петербургга бараткан.
Кулап түшкөн учак "Вагнер" жалданма аскерлеринин негиздөөчүсү Евгений Пригожинге таандык деп журналист Ксения Собчактын "Кровавая барыня" Telegram-каналы өздүк булактарына таянып жазды. Анда Пригожин өзү учактын ичинде болгону жазылган.
Алдын ала маалыматтар боюнча, РА-02795 номуру менен Embraer ERG 135 учагы кулап түшкөн деп белгилейт Baza. "Вагнер" жалданма аскерлер компаниясына жакын Gray Zone Telegram каналы Евгений Пригожиндин учагы абадан коргонуу тарабынан атып түшүрүлгөнүн билдирүүдө. Бул маалымат расмий ырастала элек.
Ошол эле учурда Евгений Пригожиндин өзү да Embraer учагынын жүргүнчүлөрүнүн катарына киргенин ТАСС федералдык аба транспорту агенттигине шилтеме берүү менен билдирди.
