Жо Байден Садыр Жапаровду АКШга саммитине чакырды
АКШ президенти Жо Байден Борбор Азия өлкөлөрүнүн президенттеринин катышуусунда С5+1 форматындагы биринчи саммитти өткөрүүнү пландоодо. Бул Байдендин Борбор Азия мамлекеттеринин башчыларына жолдогон каттарынан келип чыккан.
"19 же 20-сентябрда сиз мени менен (...) С5+1 форматындагы расмий жолугушууда коопсуздук, экономика жана экология чөйрөсүндөгү жалпы максаттарыбызды биргелешип алдыга жылдыруу жолдорун талкуулай аласыз деп ишенем", - деп Борбор Азия мамлекет башчыларын Америкага чакырганын Uzdaily маалымдады.
Кыргызстандын президенттик аппараты Kaktus.media сайтынын редакциясына Садыр Жапаровдун бул саммитке барары азырынча айтыла электигин билдирди.
Ошол эле учурда саммиттин даталары сентябрда Нью-Йоркто өтө турган БУУнун Башкы Ассамблеясынын 78-сессиясына дал келгенин белгилейбиз.
C5+1 – Америка Кошмо Штаттарынын өкмөттөрү жана Казакстан, Кыргызстан, Тажикстан, Түркмөнстан жана Өзбекстан өкмөттөрү үчүн аймактык дипломатиялык платформа.
2015-жылы түзүлгөндөн бери С5+1 эксперттик жолугушуулар жана тематикалык жумушчу топтор аркылуу АКШ-Борбор Азия министрлеринин диалогун жана кызматташтыгын кеңейтти. C5+1 Жумушчу топтору экономика, энергетика жана экология, коопсуздук сыяктуу тармактар менен алектенет.
