Шаардык милиция жарандарды ичүүчү суунун жоктугуна байланыштуу көчөлөрдү тоспоону суранат

Бишкек шаардык ички иштер башкы башкармалыгынын басма сөз кызматы жарандарды ичүүчү сууга убактылуу чектөөлөр киргизилген учурдагы кырдаалга түшүнүү менен мамиле кылууга чакырат.

"Жолдорду тоспоону суранабыз, муну менен Кыргызстандын мыйзамдарын бузуп, башка жарандардын мыйзамдуу кызыкчылыктарына кайдыгер мамиле кылып жатасыздар", - деп айтылат милициянын билдирүүсүндө.

Бишкек шаардык ички иштер башкы башкармалыгы Бишкек шаарынын тургундарына Кыргыз Республикасынын Кылмыш-жаза кодексинин 279-беренесине ылайык жолдорду мыйзамсыз тоскондугу үчүн жаза тууралуу эскертет:

• 1-бөлүк. Жолду, мыйзамсыз тосууну уюштуруу же башкаруу, башкача айтканда, жолдун өтүүчү бөлүгүндө адамдардын топтошуусун түзүү же тосмо курулмаларын, жабдууларды орнотуу аркылуу адамдардын, автомобиль, темир жол же башка транспорт каражаттарынын кыймылына бөгөт коюуга же чектөөгө багытталган аракеттерди жасоо менен башка объекттер олуттуу зыян келтирсе, - эки айдан бир жылга чейинки мөөнөткө түзөтүү жумуштарына, эсептик көрсөткүчтүн эки жүздөн беш жүзгө чейинки өлчөмүндө айып салууга же беш жылга чейинки мөөнөткө эркиндигинен ажыратууга жазаланат.
• 2-бөлүк. Ушул статьянын биринчи бөлүгүндө каралган жолду, байланыш каражаттарын мыйзамсыз тосууга катышуу, - жүз сааттан үч жүз саатка чейинки мөөнөткө коомдук жумуштарга, же бир жылдан үч жылга чейинки мөөнөткө түзөтүү жумуштарына, же болбосо эсептик көрсөткүчтүн 500дөн 1000гө чейинки өлчөмүндө айып салууга алып келет.