Сулайман-Тоого асма жол жана түрк дүйнөсүнүн уникалдуу эстеликтеринин паркы курулат
Ош шаарындагы Сулайман-Тоого асма жол жана түрк дүйнөсүнүн уникалдуу эстеликтеринин миниатюралык паркы курулат. Бул туурасында Кыргызстандын Түркиядагы элчиси Руслан Казакбаев билдирип, Түрк дүйнөсүнүн инженерлер жана архитекторлор биримдигинин Башкы катчысы Ильяс Демиржи баштаган делегациясы менен жолугушканын айтты.
Жолугушууда тараптар кызматташтыкты мындан ары өнүктүрүүнүн перспективаларына байланыштуу бир катар маселелер талкууланды.
"Сүйлөшүү учурунда Башкы катчы Ильяс Демиржи 2023-жылдын апрель айында Кыргызстанга болгон жумушчу сапарынын жыйынтыгы тууралуу, тактап айтканда, ыйык Сулайман-Тоого асма жол куруу боюнча Ош шаардык мэриясы менен макулдашылган биргелешкен долбоорлор тууралуу өзүнчө маалымат берди. Ошондой эле тоонун чокусуна флагшток орнотуу жана анын этегинде Стамбулдагыдай түрк дүйнөсүнүн уникалдуу эстеликтеринин миниатюра паркынын ачылышы да макулдашылган", - деди дипломат.
Жолугушуунун соңунда тараптар түрк дүйнөсүнүн мамлекеттеринин, атап айтканда Түрк мамлекеттеринин уюмунун алкагында ар тараптуу өз ара аракеттенүү потенциалын жогорулатуу боюнча биргелешкен күч-аракеттерди активдештирүүнүн маанилүүлүгү жөнүндө бир пикирге келишти.
