Министрлер кабинети жерге мунапыс берүү жөнүндө жобого өзгөртүүлөрдү киргизди
Министрлер кабинети 2022-жылдын 31-майында бекитилген жерге мунапыс берүүнүн тартиби жөнүндө жобого өзгөртүүлөрдү жана толуктоолорду киргизүү тууралуу токтом кабыл алды. Бул тууралуу министрлер кабинетинин басма сөз кызматы билдирди.
Буга чейин Садыр Жапаров туура бир жыл мурда республиканын бийлиги жарыялаган жерлерге мунапыс берүү процессин тездетүүнү тапшырган. Бул үчүн райондук мамлекеттик администрацияларга жана жергиликтүү өз алдынча башкаруу органдарына көмөк көрсөтүү жана усулдук жардам көрсөтүү боюнча ведомстволор аралык жумушчу топ түзүлүп, анын алдында жерлерге мунапыс боюнча комиссиялар иштеп жатат.
Топтун негизги милдети жер амнистиясынын жол-жоболорун жөнөкөйлөтүү жана тездетүү максатында ченемдик укуктук базага өзгөртүүлөрдү киргизүү боюнча сунушту иштеп чыгуу болду. Ал жерге мунапыс берүүнүн тартиби жөнүндө жобого олуттуу өзгөртүүлөрдү киргизүү жөнүндө Министрлер Кабинетинин токтомунун долбоорун иштеп чыккан.
Өзгөртүүлөр бир катар кайталанган нормаларды, комиссиялар жана ыйгарым укуктуу мамлекеттик органдар тарабынан арыз ээлеринин материалдарын кароо мөөнөттөрүн кыскартууга, түшүнүксүз сөздөрдү тактоого тиешелүү. Ошондой эле жерге мунапыс боюнча комиссияларга арыз бергенде жарандардан талап кылынуучу документтерге, арыздарды кароодо ыйгарым укуктуу мамлекеттик органдардан комиссиялар сураган корутундулардын түрлөрүнө, архитектура жана курулуш органдарынан корутундуларды жөнөкөйлөштүрүү жөнүндө жобонун пункттары өзгөртүүлөр киргизилди.
