Аламүдүн РИИБдин жетекчилери суракка чакыртылган. Анын себеби айтылды
Чүй облусунун ички иштер башкы башкармалыгынан Kaktus.media сайтына Аламүдүн районунун ички иштер бөлүмүнүн кызматкерлери эмне үчүн УКМКда суракка алынганын айтышты.
Мекеменин маалыматына караганда, пара талап кылуу фактысы боюнча козголгон кылмыш ишинин алкагында УКМКга Аламүдүн РИИБдин кызматкерлери күбө катары суракка чакыртылган. Алар сурактан кийин бошотулган.
Эске салсак, кечээ, 29-мартта ИИМдин Ички иликтөө кызматынын кызматкерлери УКМК менен биргеликте козголгон кылмыш ишинин алкагында тергөө амалдарын жүргүзүшкөн. Анын алкагында Аламүдүн РИИБдин бир катар жетекчилери УКМКнын тергөө кызматына жеткирилген.
Алдын ала маалыматтарга караганда, алар пара алуу боюнча суракка алынган: алар РИИБде турган кылмыш иши боюнча маселени чечип берүүнү убадалашып, оң чечими үчүн 5 миң доллар алышкан.
